ਨਵੀਂ ਦਿੱਲੀ, 21 ਅਗਸਤ: ਮਹਾਤਮਾ ਗਾਂਧੀ ਵੱਲੋਂ ਆਪਣੇ ਕਰੀਬੀ ਸਾਥੀ ਅਤੇ ਆਜ਼ਾਦੀ ਘੁਲਾਟੀਏ ਆਨੰਦ ਟੀ. ਹਿੰਗੋਰਾਨੀ ਲਈ ਲਿਖੇ ਗਏ 688 ਸਹੀਬੰਦ ਵਿਚਾਰਾਂ ਦਾ ਹੱਥ-ਲਿਖਤ ਸੰਗ੍ਰਹਿ ‘ਸੈਫਰਨਆਰਟ’ ਦੀ ਨਿਲਾਮੀ ਵਿੱਚ 16.20 ਕਰੋੜ ਰੁਪਏ ਵਿੱਚ ਵਿਕਿਆ ਹੈ। ਨਿਲਾਮੀ ਦੇ ਇਤਿਹਾਸ ਵਿੱਚ ਕਿਸੇ ਵੀ ਭਾਰਤੀ ਦਸਤਾਵੇਜ਼ ਲਈ ਮਿਲੀ ਇਹ ਹੁਣ ਤੱਕ ਦੀ ਸਭ ਤੋਂ ਵੱਡੀ ਕੀਮਤ ਹੈ, ਜਿਸ ਨੇ ਇੱਕ ਨਵਾਂ ਵਿਸ਼ਵ ਰਿਕਾਰਡ ਕਾਇਮ ਕੀਤਾ ਹੈ। ਹਿੰਗੋਰਾਨੀ ਦੀ ਪਤਨੀ ਵਿਦਿਆ ਦੇ ਦਿਹਾਂਤ ਤੋਂ ਬਾਅਦ, ਗਾਂਧੀ ਜੀ ਨੇ ਉਨ੍ਹਾਂ ਨੂੰ ਮਾਨਸਿਕ ਹੌਂਸਲਾ, ਮਾਰਗਦਰਸ਼ਨ ਅਤੇ ਪ੍ਰੇਰਨਾ ਦੇਣ ਲਈ ਦੋ ਸਾਲਾਂ ਤੱਕ ਰੋਜ਼ਾਨਾ ਇਹ ਖ਼ਾਸ ਸੰਦੇਸ਼ ਭੇਜੇ ਸਨ। ਇਨ੍ਹਾਂ ਵਿਚਾਰਾਂ ਨੂੰ ਬਾਅਦ ਵਿੱਚ ‘ਏ ਥੌਟ ਫਾਰ ਦਿ ਡੇਅ’ ਨਾਮ ਦੀ ਕਿਤਾਬ ਵਿੱਚ ਸ਼ਾਮਲ ਕੀਤਾ ਗਿਆ ਸੀ।
‘ਗਾਂਧੀ: ਫ੍ਰੌਮ ਦਿ ਕਲੈਕਸ਼ਨ ਆਫ ਆਨੰਦ ਟੀ. ਹਿੰਗੋਰਾਨੀ’ ਨਾਮ ਹੇਠ ਹੋਈ ਇਸ ਨਿਲਾਮੀ ਵਿੱਚ ਗਾਂਧੀ ਜੀ ਦੀਆਂ ਚਿੱਠੀਆਂ, ਤਸਵੀਰਾਂ, ਹੱਥ-ਲਿਖਤਾਂ ਅਤੇ ਉਨ੍ਹਾਂ ਦਾ ਪੇਟੀ ਚਰਖਾ ਸਮੇਤ ਕੁੱਲ 86 ਇਤਿਹਾਸਕ ਵਸਤਾਂ ਸ਼ਾਮਲ ਸਨ। ਇਹ ਦਸਤਾਵੇਜ਼ ਸੱਚ, ਅਹਿੰਸਾ, ਸੇਵਾ, ਬ੍ਰਹਮਚਾਰੀਆ, ਨਿਡਰਤਾ, ਧਾਰਮਿਕ ਭਾਈਚਾਰਾ, ਪ੍ਰਾਰਥਨਾ ਅਤੇ ਆਤਮ-ਗਿਆਨ ਵਰਗੇ ਡੂੰਘੇ ਵਿਸ਼ਿਆਂ ਨੂੰ ਬਿਆਨ ਕਰਦੇ ਹਨ। ਇਹ ਸੰਗ੍ਰਹਿ ਨਾ ਕੇਵਲ ਭਾਰਤ ਦੇ ਆਜ਼ਾਦੀ ਸੰਗਰਾਮ ਦੇ ਇੱਕ ਮਹਾਨ ਰਹਿਨੁਮਾ ਦੀ ਝਲਕ ਪੇਸ਼ ਕਰਦਾ ਹੈ, ਸਗੋਂ ਉਸ ਸੰਵੇਦਨਸ਼ੀਲ ਇਨਸਾਨ ਦੇ ਨਿੱਜੀ ਅਨੁਭਵਾਂ, ਅਨੁਸ਼ਾਸਨ ਅਤੇ ਆਪਣੇ ਸਭ ਤੋਂ ਨਜ਼ਦੀਕੀਆਂ ਪ੍ਰਤੀ ਅਥਾਹ ਪਿਆਰ ਤੇ ਹਮਦਰਦੀ ਨੂੰ ਵੀ ਉਜਾਗਰ ਕਰਦਾ ਹੈ।
