ਚੰਡੀਗੜ੍ਹ, 5 ਸਤੰਬਰ: ਜੀਂਦ ਦੇ ਮਨੋਹਰਪੁਰ ਪਿੰਡ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿੱਚ ਐੱਸ.ਆਈ.ਆਰ. (SIR) ਦੀ ਪ੍ਰਸ਼ਾਸਕੀ ਪੜਤਾਲ ਦੌਰਾਨ ਇੱਕ ਬੇਹੱਦ ਭਾਵੁਕ ਘਟਨਾ ਸਾਹਮਣੇ ਆਈ ਹੈ। ਲਗਭਗ 35 ਸਾਲਾਂ ਤੋਂ ਇੱਕ-ਦੂਜੇ ਤੋਂ ਵਿਛੜੇ ਦੋ ਭਰਾ ਰੂਟੀਨ ਦੀ ਪ੍ਰਸ਼ਾਸਕੀ ਪ੍ਰਕਿਰਿਆ ਦੌਰਾਨ ਅਚਾਨਕ ਇੱਕ-ਦੂਜੇ ਨੂੰ ਮਿਲ ਗਏ, ਜਿਸ ਨਾਲ ਉੱਥੇ ਮੌਜੂਦ ਹਰ ਸ਼ਖ਼ਸ ਦੀਆਂ ਅੱਖਾਂ ਨਮ ਹੋ ਗਈਆਂ।
ਮੁੱਖ ਚੋਣ ਅਫ਼ਸਰ (CEO) ਦਫ਼ਤਰ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਸੀਤਾ ਰਾਮ ਨਾਮ ਦਾ ਵਿਅਕਤੀ ਆਪਣਾ ਸਕੂਲ ਛੱਡਣ ਦਾ ਸਰਟੀਫਿਕੇਟ (SLC) ਲੈਣ ਲਈ ਸਕੂਲ ਆਇਆ ਸੀ। ਗੱਲਬਾਤ ਦੌਰਾਨ ਉੱਥੇ ਤਾਇਨਾਤ ਬੂਥ ਲੈਵਲ ਅਫ਼ਸਰ (BLO) ਨੇ ਪੜਤਾਲ ਵਜੋਂ ਉਸ ਤੋਂ ਉਸ ਦੇ ਪਿੰਡ, ਪਿਤਾ ਅਤੇ ਭਰਾ ਬਾਰੇ ਜਾਣਕਾਰੀ ਮੰਗੀ। ਭਰਾ ਦਾ ਨਾਮ ਪਤਾ ਲੱਗਣ ‘ਤੇ ਬੀ.ਐੱਲ.ਓ. ਨੇ ਪੁਸ਼ਟੀ ਲਈ ਉਸ ਦੇ ਭਰਾ ਨਾਲ ਫੋਨ ‘ਤੇ ਸੰਪਰਕ ਕੀਤਾ। ਸੀਤਾ ਰਾਮ ਦੀ ਪਛਾਣ ਦੀ ਪੁਸ਼ਟੀ ਹੁੰਦਿਆਂ ਹੀ ਉਸ ਦੇ ਭਰਾ ਨੇ ਭਾਵੁਕ ਹੁੰਦਿਆਂ ਦੱਸਿਆ ਕਿ ਉਹ ਪਿਛਲੇ 35 ਸਾਲਾਂ ਤੋਂ ਆਪਣੇ ਇਸੇ ਭਰਾ ਦੀ ਭਾਲ ਕਰ ਰਿਹਾ ਸੀ।
ਇਹ ਖ਼ਬਰ ਸੁਣਦਿਆਂ ਹੀ ਉਸ ਦਾ ਭਰਾ ਬਿਨਾਂ ਕੋਈ ਦੇਰ ਕੀਤੇ ਤੁਰੰਤ ਸਕੂਲ ਪਹੁੰਚ ਗਿਆ। ਜਿਵੇਂ ਹੀ ਦੋਵਾਂ ਭਰਾਵਾਂ ਨੇ ਦਹਾਕਿਆਂ ਬਾਅਦ ਇੱਕ-ਦੂਜੇ ਨੂੰ ਦੇਖਿਆ, ਉਹ ਗਲਵੱਡੀ ਪਾ ਕੇ ਫੁੱਟ-ਫੁੱਟ ਕੇ ਰੋ ਪਏ, ਜਿਸ ਨਾਲ ਪੂਰੇ ਸਕੂਲ ਵਿੱਚ ਭਾਵੁਕ ਮਾਹੌਲ ਬਣ ਗਿਆ। ਮੌਕੇ ‘ਤੇ ਮੌਜੂਦ ਸਹਾਇਕ ਚੋਣ ਰਜਿਸਟ੍ਰੇਸ਼ਨ ਅਫ਼ਸਰ (AERO) ਡਾ. ਰਮੇਸ਼ ਕੁਮਾਰ ਨੇ ਇਸ ਮਿਲਾਪ ਨੂੰ ਨਾ-ਭੁੱਲਣਯੋਗ ਅਨੁਭਵ ਦੱਸਦਿਆਂ ਕਿਹਾ ਕਿ ਬੀ.ਐੱਲ.ਓ. ਦੀ ਚੌਕਸੀ ਅਤੇ ਸਾਧਾਰਨ ਪੜਤਾਲੀਆ ਪ੍ਰਕਿਰਿਆ ਨੇ ਇੱਕ ਸਰਕਾਰੀ ਕੰਮ ਤੋਂ ਪਰ੍ਹੇ ਜਾ ਕੇ ਦੋ ਵਿਛੜੇ ਭਰਾਵਾਂ ਨੂੰ ਮੁੜ ਮਿਲਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ।
