ਨਿਊਯਾਰਕ, 13 ਸਤੰਬਰ: ਟੈਨਿਸ ਖਿਡਾਰਨਾਂ ਟੇਲਰ ਟਾਊਨਸੈਂਡ ਅਤੇ ਕੈਟਰੀਨਾ ਸਿਨਿਆਕੋਵਾ ਨੇ ਯੂ ਐੱਸ ਓਪਨ ਮਹਿਲਾ ਡਬਲਜ਼ ਦਾ ਖ਼ਿਤਾਬ ਜਿੱਤ ਕੇ ਬਤੌਰ ਜੋੜੀ ਆਪਣਾ ਕਰੀਅਰ ਗਰੈਂਡ ਸਲੈਮ ਪੂਰਾ ਕਰ ਲਿਆ ਹੈ। ਸਿਖਰਲਾ ਦਰਜਾ ਪ੍ਰਾਪਤ ਇਸ ਜੋੜੀ ਨੇ ਆਰਥਰ ਐਸ਼ ਸਟੇਡੀਅਮ ਵਿੱਚ ਖੇਡੇ ਗਏ ਫਾਈਨਲ ਵਿੱਚ ਐਸ਼ਲਿਨ ਕਰੂਗਰ ਅਤੇ ਰੌਬਿਨ ਮੋਂਟਗੋਮਰੀ ਦੀ ਵਾਈਲਡ ਕਾਰਡ ਜੋੜੀ ਨੂੰ 5-7, 6-0, 6-2 ਨਾਲ ਮਾਤ ਦਿੱਤੀ।ਮੈਚ ਦੀ ਸ਼ੁਰੂਆਤ ਟਾਊਨਸੈਂਡ ਅਤੇ ਸਿਨੀਆਕੋਵਾ ਲਈ ਕਾਫ਼ੀ ਚੁਣੌਤੀਪੂਰਨ ਰਹੀ। ਉਹ ਪਹਿਲੀਆਂ ਤਿੰਨ ਗੇਮਾਂ ਅਤੇ ਪਹਿਲਾ ਸੈੱਟ ਹਾਰ ਗਈਆਂ। ਟਾਊਨਸੈਂਡ ਨੇ ਸਵੀਕਾਰ ਕੀਤਾ ਕਿ ਉਹ ਸ਼ੁਰੂਆਤ ਵਿੱਚ ਘਬਰਾਈ ਹੋਈ ਸੀ, ਪਰ ਸਿਨੀਆਕੋਵਾ ਦੇ ਹੌਸਲੇ ਨਾਲ ਦੋਵਾਂ ਨੇ ਸ਼ਾਨਦਾਰ ਵਾਪਸੀ ਕੀਤੀ। ਨੈੱਟ ’ਤੇ ਹਮਲਾਵਰ ਖੇਡ ਦਿਖਾਉਂਦਿਆਂ ਉਨ੍ਹਾਂ ਨੇ ਅਗਲੇ ਦੋਵੇਂ ਸੈੱਟ ਆਸਾਨੀ ਨਾਲ ਜਿੱਤ ਕੇ ਮੈਚ ’ਤੇ ਕਬਜ਼ਾ ਕਰ ਲਿਆ। ਇਹ ਟਾਊਨਸੈਂਡ ਦਾ ਚੌਥਾ ਵੱਡਾ ਖ਼ਿਤਾਬ ਹੈ। ਇਸ ਤੋਂ ਪਹਿਲਾਂ ਇਹ ਜੋੜੀ 2024 ਵਿੱਚ ਵਿੰਬਲਡਨ, 2025 ਵਿੱਚ ਆਸਟਰੇਲੀਅਨ ਓਪਨ ਅਤੇ ਇਸੇ ਸਾਲ ਫਰੈਂਚ ਓਪਨ ਜਿੱਤ ਚੁੱਕੀ ਹੈ। ਦੂਜੇ ਪਾਸੇ, ਸਿਨੀਆਕੋਵਾ ਦਾ ਇਹ 12ਵਾਂ ਗਰੈਂਡ ਸਲੈਮ ਖ਼ਿਤਾਬ ਹੈ, ਜਿਸ ਨੇ ਇਸ ਤੋਂ ਪਹਿਲਾਂ ਬਾਰਬੋਰਾ ਕ੍ਰੇਜ਼ਸਿਕੋਵਾ ਨਾਲ ਸੱਤ ਅਤੇ ਕੋਕੋ ਗੌਫ ਨਾਲ ਇੱਕ ਖ਼ਿਤਾਬ ਜਿੱਤਿਆ ਹੈ। ਹਾਰਨ ਦੇ ਬਾਵਜੂਦ, ਵਿਸ਼ਵ ਰੈਂਕਿੰਗ ਵਿੱਚ 570ਵੇਂ ਅਤੇ 610ਵੇਂ ਸਥਾਨ ’ਤੇ ਕਾਬਜ਼ ਕਰੂਗਰ ਅਤੇ ਮੋਂਟਗੋਮਰੀ ਦੀ ਜੋੜੀ ਦਾ ਸਫ਼ਰ ਵੀ ਬਹੁਤ ਸ਼ਾਨਦਾਰ ਰਿਹਾ।
ਪੁਰਸ਼ ਸਿੰਗਲਜ਼ ਵਰਗ ਵਿੱਚ ਅਮਰੀਕੀ ਟੈਨਿਸ ਖਿਡਾਰੀ ਬੈੱਨ ਸ਼ੈਲਟਨ ਨੇ ਆਪਣੇ ਹਮਵਤਨ ਫਰਾਂਸਿਸ ਟਿਆਫੋ ਨੂੰ 4-6, 6-3, 6-3, 7-5 ਨਾਲ ਹਰਾ ਕੇ ਫਾਈਨਲ ਵਿੱਚ ਪ੍ਰਵੇਸ਼ ਕਰ ਲਿਆ ਹੈ। ਐਤਵਾਰ ਨੂੰ ਹੋਣ ਵਾਲੇ ਖ਼ਿਤਾਬੀ ਮੁਕਾਬਲੇ ਵਿੱਚ ਉਸ ਦਾ ਸਾਹਮਣਾ ਪਹਿਲਾ ਦਰਜਾ ਪ੍ਰਾਪਤ ਅਲੈਗਜ਼ੈਂਡਰ ਜ਼ਵੇਰੇਵ ਨਾਲ ਹੋਵੇਗਾ, ਜਿਸ ਨੇ ਪਹਿਲੇ ਸੈਮੀ ਫਾਈਨਲ ਵਿੱਚ ਕਾਰੇਨ ਖਾਚਾਨੋਵ ਨੂੰ 6-3, 7-6, 7-6 ਨਾਲ ਮਾਤ ਦਿੱਤੀ ਸੀ। ਹੁਣ ਸ਼ੈਲਟਨ ਕੋਲ ਅਮਰੀਕਾ ਲਈ ਇਸ ਗਰੈਂਡ ਸਲੈਮ ਖ਼ਿਤਾਬ ਦਾ 21 ਸਾਲ ਪੁਰਾਣਾ ਸੋਕਾ ਖ਼ਤਮ ਕਰਨ ਦਾ ਸੁਨਹਿਰੀ ਮੌਕਾ ਹੈ।
