ਕਹਿੰਦੇ ਹਨ ‘ਮਨ ਕੇ ਹਾਰੇ ਹਾਰ ਹੈ, ਮਨ ਕੇ ਜੀਤੇ ਜੀਤ’। ਇਸ ਕਹਾਵਤ ਨੂੰ ਰਾਜਸਥਾਨ ਦੀ ਰੋਹਿਣੀ ਗੁਰਜਰ ਨੇ ਬਿਲਕੁਲ ਸੱਚ ਸਾਬਤ ਕਰ ਦਿਖਾਇਆ ਹੈ। ਇੱਕ ਛੋਟੇ ਜਿਹੇ ਪਿੰਡ ਦੇ ਸਾਧਾਰਨ ਪਰਿਵਾਰ ਨਾਲ ਸਬੰਧਤ ਰੋਹਿਣੀ ਨੇ ਆਪਣੀ ਜ਼ਿੰਦਗੀ ਵਿੱਚ ਇੰਨੇ ਦੁੱਖ ਝੱਲੇ ਕਿ ਸੁਣਨ ਵਾਲਾ ਵੀ ਹੈਰਾਨ ਰਹਿ ਜਾਵੇ। ਪਰ ਉਨ੍ਹਾਂ ਨੇ ਹਿੰਮਤ ਨਾ ਹਾਰਦਿਆਂ ‘ਹਾਰਿਆ ਉਹੀ, ਜੋ ਲੜਿਆ ਨਹੀਂ’ ਦੇ ਜਜ਼ਬੇ ਨਾਲ ਤਮਾਮ ਮੁਸ਼ਕਲਾਂ ਦਾ ਸਾਹਮਣਾ ਕੀਤਾ ਅਤੇ ਰਾਜਸਥਾਨ ਪ੍ਰਸ਼ਾਸਨਿਕ ਸੇਵਾ (RAS) ਪ੍ਰੀਖਿਆ ਪਾਸ ਕਰਕੇ ਅਫ਼ਸਰ ਬਣਨ ਦਾ ਸੁਪਨਾ ਪੂਰਾ ਕੀਤਾ।
ਰੋਹਿਣੀ ਗੁਰਜਰ ਰਾਜਸਥਾਨ ਦੇ ਘੁੱਘਰਾ ਪਿੰਡ ਦੀ ਰਹਿਣ ਵਾਲੀ ਹੈ ਅਤੇ ਉਨ੍ਹਾਂ ਦੇ ਪਿਤਾ ਫੌਜ ਵਿੱਚ ਸਨ। ਰੋਹਿਣੀ ਨੇ ਸਾਲ 2006 ਵਿੱਚ ਆਪਣੀ ਗ੍ਰੈਜੂਏਸ਼ਨ ਪੂਰੀ ਕੀਤੀ ਅਤੇ ਉਹ ਆਪਣੇ ਪਿੰਡ ਦੀ ਪਹਿਲੀ ਗ੍ਰੈਜੂਏਟ ਕੁੜੀ ਬਣੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਅੱਗੇ ਪੜ੍ਹਾਈ ਛੱਡ ਕੇ ਇੱਕ ਪ੍ਰਾਈਵੇਟ ਸਕੂਲ ਵਿੱਚ ਪੜ੍ਹਾਉਣਾ ਸ਼ੁਰੂ ਕਰ ਦਿੱਤਾ। ਸਾਲ 2011 ਵਿੱਚ ਉਨ੍ਹਾਂ ਦਾ ਵਿਆਹ ਅਜਮੇਰ ਦੇ ਨਾਰੇਲੀ ਪਿੰਡ ਵਿੱਚ ਹੋਇਆ। ਵਿਆਹ ਤੋਂ ਬਾਅਦ ਉਨ੍ਹਾਂ ਨੇ ਆਪਣੇ ਪਤੀ ਨਾਲ ਮਿਲ ਕੇ ਸਰਕਾਰੀ ਨੌਕਰੀ ਦਾ ਸੁਪਨਾ ਦੇਖਿਆ ਅਤੇ ਦੋਵੇਂ ਆਰ.ਏ.ਐੱਸ. ਦੀ ਤਿਆਰੀ ਕਰਨ ਲੱਗੇ। ਸਾਲ 2013 ਵਿੱਚ ਉਨ੍ਹਾਂ ਦੇ ਘਰ ਧੀ ਨੇ ਜਨਮ ਲਿਆ।
ਕਿਸਮਤ ਨੂੰ ਕੁਝ ਹੋਰ ਹੀ ਮਨਜ਼ੂਰ ਸੀ। 18 ਫਰਵਰੀ 2021 ਨੂੰ ਹਾਰਟ ਅਟੈਕ ਕਾਰਨ ਰੋਹਿਣੀ ਦੇ ਪਤੀ ਦੀ ਮੌਤ ਹੋ ਗਈ। ਪਤੀ ਦੀ ਮੌਤ ਦੇ ਸਦਮੇ ਤੋਂ ਉੱਭਰਦਿਆਂ ਉਨ੍ਹਾਂ ਨੇ ਫਿਰ ਤੋਂ ਆਰ.ਏ.ਐੱਸ. ਦੀ ਤਿਆਰੀ ਸ਼ੁਰੂ ਕੀਤੀ ਅਤੇ ਆਰ.ਏ.ਐੱਸ. 2023 ਦੀ ਪ੍ਰੀਲਿਮਜ਼ ਪ੍ਰੀਖਿਆ ਪਾਸ ਕਰ ਲਈ। ਪਰ ਮੁੱਖ ਪ੍ਰੀਖਿਆ (Mains) ਤੋਂ ਮਹਿਜ਼ ਅੱਠ ਦਿਨ ਪਹਿਲਾਂ ਬੀਮਾਰ ਚੱਲ ਰਹੀ ਉਨ੍ਹਾਂ ਦੀ 10 ਸਾਲਾ ਧੀ ਦਾ ਵੀ ਦਿਹਾਂਤ ਹੋ ਗਿਆ।
ਧੀ ਨੂੰ ਖੋਣ ਤੋਂ ਬਾਅਦ ਰੋਹਿਣੀ ਨੇ ਪ੍ਰੀਖਿਆ ਦੇਣ ਦਾ ਇਰਾਦਾ ਛੱਡ ਦਿੱਤਾ ਸੀ, ਪਰ ਪਰਿਵਾਰ ਦੇ ਸਮਝਾਉਣ ‘ਤੇ ਉਹ ਮੁੱਖ ਪ੍ਰੀਖਿਆ ਦੇਣ ਲਈ ਰਾਜ਼ੀ ਹੋਈ। ਪ੍ਰੀਖਿਆ ਤੋਂ ਦੋ ਦਿਨ ਪਹਿਲਾਂ ਜੈਪੁਰ ਵਿੱਚ ਇੱਕ ਹਾਦਸੇ ਦੌਰਾਨ ਉਨ੍ਹਾਂ ਦੀ ਅੱਖ ‘ਤੇ ਗੰਭੀਰ ਸੱਟ ਲੱਗ ਗਈ ਅਤੇ ਡਾਕਟਰਾਂ ਨੂੰ ਅੱਖ ‘ਤੇ ਪੱਟੀ ਬੰਨ੍ਹਣੀ ਪਈ। ਇਸ ਦੇ ਬਾਵਜੂਦ ਇੱਕ ਅੱਖ ਨਾਲ ਹੀ ਉਨ੍ਹਾਂ ਨੇ ਮੁੱਖ ਪ੍ਰੀਖਿਆ ਦਿੱਤੀ। ਰੋਹਿਣੀ ਨੇ ਨਾ ਸਿਰਫ਼ ਇਹ ਪ੍ਰੀਖਿਆ ਅਤੇ ਇੰਟਰਵਿਊ ਪਾਸ ਕੀਤਾ, ਬਲਕਿ ਅਫ਼ਸਰ ਬਣ ਕੇ ਦਿਖਾਇਆ। ਅੱਜ ਉਹ ਰਾਜਸਥਾਨ ਅਕਾਊਂਟਸ ਸਰਵਿਸ ਵਿੱਚ ਆਪਣੀਆਂ ਸੇਵਾਵਾਂ ਦੇ ਰਹੀ ਹਨ।
