ਮੱਧ ਪ੍ਰਦੇਸ਼ ਦੇ ਰਾਜਗੜ੍ਹ ਜ਼ਿਲ੍ਹੇ ਦੇ ਬਿਓਰਾ ਦਾ ਰਹਿਣ ਵਾਲਾ 20 ਸਾਲਾ ਸੁਰੇਂਦਰ ਸਿੰਘ ਚੌਧਰੀ ਉਰਫ਼ ‘ਬਿੱਟੂ ਤਬਾਹੀ’ ਆਪਣੇ ਦ੍ਰਿੜ ਇਰਾਦੇ ਨਾਲ ਸਮਾਜ ਲਈ ਵੱਡੀ ਪ੍ਰੇਰਨਾ ਬਣ ਕੇ ਉੱਭਰਿਆ ਹੈ। ਪ੍ਰਦੂਸ਼ਿਤ ਹੋ ਚੁੱਕੀ ਸਥਾਨਕ ਅਜਨਾਰ ਨਦੀ ਦੀ ਹਾਲਤ ਦੇਖ ਕੇ ਉਸ ਨੇ ਕਿਸੇ ਸਰਕਾਰੀ ਮੁਹਿੰਮ ਦੀ ਉਡੀਕ ਕਰਨ ਦੀ ਬਜਾਏ ਖੁਦ ਹੀ ਇਸ ਨੂੰ ਸੁਰਜੀਤ ਕਰਨ ਦਾ ਬੀੜਾ ਚੁੱਕਿਆ। ਇਸੇ ਸਾਲ ਦੀ ਸ਼ੁਰੂਆਤ ਵਿੱਚ ਦੋਸਤਾਂ ਨਾਲ ਸ਼ੁਰੂ ਕੀਤੀ ਇਸ ਮੁਹਿੰਮ ਵਿੱਚ ਜਦੋਂ ਦੋਸਤ ਪਿੱਛੇ ਹਟ ਗਏ, ਤਾਂ ਵੀ ਬਿੱਟੂ ਨੇ ਹਿੰਮਤ ਨਹੀਂ ਹਾਰੀ ਅਤੇ ਇਕੱਲਿਆਂ ਹੀ ਨਦੀ ਵਿੱਚ ਉਤਰ ਕੇ ਸਫ਼ਾਈ ਜਾਰੀ ਰੱਖੀ।
ਨਦੀ ਦੀ ਸਫ਼ਾਈ ਦਾ ਇਹ ਸਫ਼ਰ ਬਿੱਟੂ ਲਈ ਕਾਫ਼ੀ ਚੁਣੌਤੀਪੂਰਨ ਰਿਹਾ। ਉਸ ਨੇ ਆਪਣੇ ਪੈਸਿਆਂ ਨਾਲ ਸਾਧਾਰਨ ਔਜ਼ਾਰ ਖਰੀਦੇ ਅਤੇ ਹੱਥਾਂ ਨਾਲ ਪਲਾਸਟਿਕ ਦਾ ਕੂੜਾ, ਕਾਈ ਤੇ ਗੰਦਗੀ ਬਾਹਰ ਕੱਢੀ। ਗੰਦੇ ਪਾਣੀ ਵਿੱਚ ਲਗਾਤਾਰ ਕਈ ਘੰਟੇ ਖੜ੍ਹੇ ਰਹਿਣ ਕਰਕੇ ਉਸ ਨੂੰ ਸਿਹਤ ਸਬੰਧੀ ਸਮੱਸਿਆਵਾਂ ਵੀ ਆਈਆਂ ਅਤੇ ਸਿਰਫ਼ ਇੱਕ ਘਾਟ ਨੂੰ ਸਾਫ਼ ਕਰਨ ਵਿੱਚ ਹੀ ਢਾਈ ਤੋਂ ਤਿੰਨ ਮਹੀਨੇ ਦਾ ਸਮਾਂ ਲੱਗ ਗਿਆ। ਸ਼ੁਰੂਆਤ ਵਿੱਚ ਕੁਝ ਲੋਕਾਂ ਨੇ ਉਸ ‘ਤੇ ਸਿਰਫ਼ ਸੋਸ਼ਲ ਮੀਡੀਆ ‘ਤੇ ‘ਵਿਊਜ਼’ ਅਤੇ ‘ਲਾਇਕਸ’ ਲਈ ਨਾਟਕ ਕਰਨ ਜਾਂ ਵੀਡੀਓਜ਼ ਨੂੰ ਏ.ਆਈ. (AI) ਦੁਆਰਾ ਬਣਾਇਆ ਹੋਣ ਦੇ ਦੋਸ਼ ਵੀ ਲਾਏ, ਪਰ ਬਿੱਟੂ ਨੇ ਨਦੀ ਦੇ ਬਦਲੇ ਹੋਏ ਰੂਪ ਦੀਆਂ ਵੀਡੀਓਜ਼ ਸਾਂਝੀਆਂ ਕਰਕੇ ਸਭ ਦਾ ਮੂੰਹ ਬੰਦ ਕਰ ਦਿੱਤਾ। ਅੱਜ ਸੋਸ਼ਲ ਮੀਡੀਆ ‘ਤੇ ਉਸ ਦੇ 3 ਲੱਖ ਤੋਂ ਵੱਧ ਫਾਲੋਅਰਜ਼ ਹਨ।
ਬਿੱਟੂ ਦੇ ਇਸ ਜਜ਼ਬੇ ਦੀ ਚਰਚਾ ਹੁਣ ਦੇਸ਼ ਭਰ ਵਿੱਚ ਹੋ ਰਹੀ ਹੈ ਅਤੇ ਉਦਯੋਗਪਤੀ ਆਨੰਦ ਮਹਿੰਦਰਾ ਨੇ ਵੀ ਉਸ ਦੀ ਜੰਮ ਕੇ ਸ਼ਲਾਘਾ ਕੀਤੀ ਹੈ। ਮਹਿੰਦਰਾ ਨੇ ਉਸ ਨੂੰ ਆਪਣਾ ‘ਮੰਡੇ ਮੋਟੀਵੇਸ਼ਨ’ ਦੱਸਦਿਆਂ ਲਿਖਿਆ ਕਿ ਜੇਕਰ ਸੋਸ਼ਲ ਮੀਡੀਆ ‘ਤੇ ‘ਲਾਇਕਸ’ ਦੀ ਇੱਛਾ ਕਿਸੇ ਅਜਿਹੇ ਚੰਗੇ ਕੰਮ ਦਾ ਜ਼ਰੀਆ ਬਣਦੀ ਹੈ, ਤਾਂ ਇਹ ਬਹੁਤ ਵਧੀਆ ਗੱਲ ਹੈ। 20 ਸਾਲ ਦੀ ਉਮਰ ਵਿੱਚ ਬਿੱਟੂ ਤਬਾਹੀ ਦਾ ਇਹ ਕਦਮ ਸਾਬਤ ਕਰਦਾ ਹੈ ਕਿ ਵਾਤਾਵਰਨ ਦੀ ਸੰਭਾਲ ਲਈ ਜੇਕਰ ਇੱਕ ਨੌਜਵਾਨ ਪਹਿਲ ਕਰ ਸਕਦਾ ਹੈ, ਤਾਂ ਪੂਰਾ ਸਮਾਜ ਵੀ ਉਸ ਤੋਂ ਪ੍ਰੇਰਨਾ ਲੈ ਸਕਦਾ ਹੈ।
